في بلد الفرح الدائم : بالكورة نلهيوكم وفي فلوسكم نرزيوكم

في غانا عندنا طبيعة مشومة, تنجمو زادة تعتبروها صنعة خايبة

كل شيئي تعمل بالسرقة والدرقة : البوليس يتخبى وراء الشجرة, الحاكم يستنى فيك فالدورة الخبز يزيد بالغورة و كان سترجلو معاك و ما زادوش فالسوم, يتلفو الجرة و ينقصو فالميزان. و يا بوك تجي فالحنديرة.

آش قولكم في واحد شايخ ولا هوى مكشبر بعد ماتش كورة و عندو ولدو تخرج نتيجتو متاع الباك, ما تتصوروش محلاها كيف تقوم نهار الأحد الصباح و تاقف فالكيوسك باش تصب الإيسونص و تلقاه زاد, زاد بسبعين فرنك, سبعين يا بو قلب. راهو موش معقول هكا.

الإيسونس ولا ب1320 بجاه ربي قولولي شكون مازال يقدر عليه. و أحنا التوانسة مانا زعام, قريب كيف تمشي تخطب يولي نسيبك يطلب عليك خاتم ديامنت و خبزة قاتو و بيدون إيسونص. أما فالعرس لازمك تجيب كرني متع بونوات. إمالا نلعبو؟

إمالا كيفاش؟ لازمنا نواكبو عصرنا و نتعصرو زادة.

مازال التونسي يقدر عالكرهبة؟ مازال ينجم يخرج و يتفرهد بكرهبتو؟ كونشي إذا يتمرمد فالكار الصفراء و يتبحبح فالعروقات والسنان والدزان.

والي عندو عايلة ماذا بيه يشد دارو وإلا يختار يا يوكل صغارو يا يوكل كرهبتو أما الزوز لا

ويقعد الحل الأخير هوالتاكسي لمن إستطاع إليه سبيلا

يعني على هالدزة من هنا لآخر الصيف باش يولي الإيسونص ب 1500؟

المشكلة فين إلي موش الإيسونص بركة يزيد عندك كل المواد المربوطة بصفة مباشرة وغير مباشرة يعني ماخضرة والماكلة حتى الحوايج والضو والماء والأوناس و الدخان وكان لزم يزيدو فالسوم متاع صباح الخير و صحة أنستو بعد إلي التونسي ولا يبخل ماعادش يقولهم و كيف نقول يبخل راني مانيش نحكي عالكسل.

حطيت مخي و بديت نخمم في فازة تهمني إلي هي زيارة ولدي إلي يعيش هو و أمو في بلاصة تبعد 80 كيلومتر من تونس

يعني بين نفقة ومشية و جية من غير ما نجيبو معايا لتونس باش يشوفوه الدار و نحوس بيه شوية نلقاها الحسبة تدور فالشهرية متاع راجل بشلاغمو و يصرف على مرا و زوز صغار

هيا سيبونا مالمواضيع إلي تركب السكر

شقولكم فالسخانة ليوم؟ حلها تبحيرة. آش من تبحيرة بجاه ربي, كان باش تهز الكرهبة و تمشي لبعد البلاصة ما يفككش من 15 دينار فالكيوسك أخطى التناوش الزايدة.

إبتسم إنها تونس