عمار الي عامل العار طلع إسمو العاطي شهر الواطي

الناس الكل  ظاهرلي تعرف عمار الي عمل العاربال404 متاعو

 

والله أش باش نقلكم راهو المقص والجلم في طبيعتنا كتوانسة و كعرب و كبشر

 

ملي واحد يتولد و هو عايش في محيط إجتماعي و سياسي و إقتصادي شعاره’ كلنا مع المقص’ وراني مانيش قاعد نلقالو في أعذار على خاطر أنا ملي صغير والوالد ربي يفظلو و يطول في عمرو عاطينا الحرية فالتعبير عالرأي و كنا نحاولو نتناقشو في كل المسائل الي تخصنا جميعا ولا كل واحد وحدو

 

بآختصار كنت ديما نلقا روحي في وضعيات محرجة شوية وقت الي نخرج مالنطاق العائلي الضيق و ندخل فالنطاق الموسع و خاصة من شيرة عايلت الوالدة ربي يحفظها ولا فالنطاق المدرسي والإجتماعي

 

كنت نتنعت بجميع الألفاظ المربوطة بالسياق هذا والي تمشي من « جلطام » إلى  » ما يقدرش » و « ما يحشمش » و « ما يخافش » و « مقوش » ( جاية ماليسارية) إلى أخره مالنعوت الي جاية من سجل الرقابة الذاتية والثقافة الترهيبية

 

من قدر بوك, إحشم على روحك, أش مدخلك, كول وآسكت, إطلع شد بيتك, ولا عندك فم و تتكلم, ما أصح رقعتك و هات من هاك اللاوي

 

مخ الهدرة, كبرت نلقى روحي مبهم فالإنتاج المحلي المبني عالرهبة والترهيب والطرايح  واليزي والفك علينا والآش مدخلك و دخلنا و هو أكبر منك و برشة حاجات الي تخصيك و تخليك تنحي ضميرك و تحطو فالقجر قبل ما تخرج تقابل المجتمع (كليت طرايح كيف الناس الكل أما على بلابزي و فصعاتي موش على أفكاري و آرائي و كلامي)

 

يعني مالمنطلق هذا ممكن باش نفهمو إلي سي عمار إلي في آخر حلقة طلع إسمو ‘العاطي’ و كنيتو ‘الواطي’ و بما يعبر عنو بالفرنسية

 

ATI –  décadence

 

يعني أنا من رايي أنو نحاولو نداويو و نعالجو مصدر العلة موش نكتفيو بتغطية و تغطية العوارض

 

باش نشدو العاطي نعتيوه طريحة ولا نحطوه فالحبس ولا حتى نحطولو سكوتش على فمو ماهوش باش يحل المشكل

 

لازمنا نخممو باش نتعرضو لفكر جماعي سائد متربي عالسياسة الردعية والوصاية و محو مبدأ المسؤولية

 

خاطر كان ناخذو الوقت باش نحللو نتائج الكبت والقمع نلقاوها تأدي إلى تصرفات كيما متع سي عاشور ناجي ولا زادا كيما متع الناس الأخرين مالطرف الآخر في أول فرصة تجي في يدهم بصيص من الحرية

 

هاذي هي الأشياء الي حقها تتراقب و تتحجب خاطر الدنيا موش مسيبة و نحبو ولا نكرهو فاقد الشيئ لا يعطيه

 

نتصورهم الجماعة هاذم يقولو الكلام هذا في مواقف إجتماعية مفتوحة خارجة عن النطاق التدويني؟ صعيب ياسر

 

التدوين والنقاش يدخل في مجال المواطنة المسؤولة و ماذا بيا كل واحد زادا يراجع شوية روحو

 

يسقط العاطي الواطي و يسقط التطرف الفكري الغير مسؤول

 

و باش نتمكنو مالتقدم لازمنا نرجعو للقديم و نعتبرو منو