مد ما ترد, الجبال تتهد

ثلاثة و عشرين سنة والشعب حامل الذل و ساكت.  ثلاثة و عشرين سنة والشي ماشي و يزيد

كل مرة نقولو لعل يهدي ربي من كان سبب و كل مرة الشي على قدام. الطنجرة تغلي والغطاء كل مرة يتهز طريف. و كل مرة تاكل بعضها في بلاصة و شيء. ما حبوش يفهمو إلي حتى كانو بهيم حاشاكم ياكل الضرب و يسكت, أما كان يفلقط راهو يدوان و يولي يصك

شعب سكوتي, شعب خواف, شعب ياكل الخبزة و يتكى, شعب بايعها بلفته, شعب مستكفي بروحو. أما راهو شعب كروزي و كان طلعتلو الكلبة بنت الكلب,يسكر و يبلبزها

عندي مدة ماللي خرجت من تونس خاطر تيقرت و ماعادش فيها دواء. يا باش نهبل يا باش يدكوني في بو فردة خاطرني باش نعمل بعد العملة. و ماللي خرجت واللي صاير يزيد يؤكدلي فاللي أنا عملتو هو الصحيح

آخر ما ثمة هو الشي اللي قاعد يصير في سيدي بو زيد و ما جاورها. نتبع من بعيد و يا ويلي نبكي يا ويلي نفرح عاللي نشوف فيه

موتى و مجاريح, شباب فلقط ما لقى فيها وين, ولى يا يحرق لبرة يا يحرق روحو. الحاكم  ولى يضرب في خوه و في ولد بلادو بالكرتوش خاطر الشيء وصل لحد مخطر ياشر

كل مرة نخمم فيها و نقول إلي الشعب هذا ما يستاهلش الذل هذا الكل و باش تتبدل الأمور لازم يهبط للشارع و يسيل الدم

أنا جبان ياسر و ما لقيتش حل آخر بخلاف أني نهرب بجلدي. حاولت قدر ما نقدر و بطريقتي أنا باش نبدل حاجات و فشلت أما أنا اليوم فرحان برشة خاطر الكاس فاض و التونسي هبط للشارع باش ياخو حقو بيدو

النضام التونسي مواصل فالتعتيم و في تضليل الرأي العام بالبيانات الكاذبة والتصريحات المفبركة واأخبار الزائفة و لكن الشعب ما عادش يحصل. الحقيقة ولات تخرج والعالم الكل قاعد يشوف فيها

ما تبكيش يا أم محمد البوعزيزي, ما تبكيش يا أم حسين الناجي, ما تبكيوش يا نساء تونس راهي أرواح ولادكم باش ترجع قدر كل البلاد

ساعات نتمنى نكون غادي باش نعاون الناس الي تحارب باش ترجع قدر البلاد أما العين بصيرة واليد قصيرة

هز الكنتولة يا علي يا أبو السواعد البناية, مهما طوال السلوم الدرجات ليها نهاية

العين تنحب من فراق بلادي