أنا نحبها بيضاء, ونتوما كيفاش تحبوها؟

مالي أنا صغير ما نحبها كان بيضاء, سبحان الله جربت الأخرين وندور ندور نرجع للبيضاء

الدنيا أذواق وأنا ذوقي جاء معا اليبضاء

تي هوا حتي فالبيضاء فما أنواع و أشكال

و أنا البيضاء بأنواعها تعجبني

كيف نراها؟ أوووه ما نحكيلكمش أس يصير فيا

حتا الكحلة قد ما يعملولها باش تظهر بيضاء وشيء

بيلبزولها كرايم فوقها وزينة وهيلمان

نذوقها, تعجبني أما نرجع للبيضاء متاعي

فارينة ولا سميد ديما هايلة

سمن ولا زبدة ديما فاوحة

عسل ولا شحور ديما حلوة

ناتورال ولا بالزعطر ديما بنينة

نتفكر كي كنت صغير كنت كي نمشي لدار ماماتي الله يرحمها و يذكرها بالخير كانت ديما تعمل الزوز

وأنا ما تغرمت بالعصيدة البيضاء كان في جرتها

كانت عندها زنس عصيدة بيضاء بالسميد والسمن والعسل

ما نحكيلكمش كيف تبدا مازالت سخونة تفور كيفاش تعملها كي البركان و تعمل فيها هاك النقبة فالوسط وتملاها بالزبدة و تعملي عليها فرشة عسل

آآآه قداش توحشتها

المهم توة

الفايدة موش فالعصيدة واكاهو

راهو اليوم مولد

المولد النبوي الشريف

يعني عيد ميلاد الرسول, سيدنا محمد صلى الله عليه وسلم

وبهالمناسبة نتمنالكم مولد مبروك ليكم الكل ومعا برشة حاجات اهين

من غير ما ننسى الناس الي نحبهم و عزاز علي أما ماهمش بحذايا

نادية, نادية, إيمان, ملكة, سنية, منو, فارس ,حاتم, شمس الدين وغيرهم وغيرهم

يطول الوقت ولا يقصار نتلقاو بحول الله

هياو توة وقيت باش نمشي نحظر روحي ونمشي نرقد حلفة للوالدة باش تعملي عصيدة بيضاء

 

تشاو

 

Saliha – Nzed ennabi

 

 

نسيت باش نقلكم

موش ليوم 20 مارس

ضاهرلي عيد الإستقلال

رغملي مانيش فرحان ياسر إلي آستقلينا أما كل عام و تونس بخير

موش تونس الكل

أما الناس الباهية موش الناس الي عملت فيها البطيط

ربكم يمهل ولا يهمل فرعون وجبروتو ولى تراب

مو مبعد مديدة قطنة و دبوزة عطر و أوموركم فالجبن