Stupeur! Un nouveau départ!!

الناس الكل تعرف الأغلاط الفادحة الي نلقاوها على المينوات متع المطاعم و كذلك حكاية الشاكمون و العقب في دقيقة و ملك االدجاج و حوت المحيط و غيرها من الطلعات الممتازة للخطاطين في بلاد التكمبين

التينده هاذي بالذات خلاتني نخمم في برشة حاجات

مطعم يعتبر روحو محترم, الديكور حلو موش دوني و بلاصتو في قلب البلاد في منطقة تعتبر إدارية الكلها إطارات و كوادر عليا الفطور غادي ما يفككش من 10 دينارات للراس

العيب موش فالخطاط برك أما في مولا المحل الي قبلها و راضي بيها

والله كان جيت عندي سلطة لاما نعدي قانون ما يسمحش خدمة خطاط لإنسان ما عندوش شهاده عليا و قانون آخر يعطي خطية للي يسمح لروحو باش يحط بلاكة ولا تيندة فيها زلعة من النوع هذا

و كيف نشوف حاجات هكا نفهم علاش هاك القزم نيكولا ساركوزي رئيس فرنسا يحكي إلي عندهم الذكا  و أحنا عنا اليدين

التونسي للتونسي رحمة, و ساعات التونسي للتونسي نقمة و في آخر حلقة, يطلع التونسي للتونسي لحمة

عمري ما ريت شعب يتسلحف و يتكربص و يتأقلم كيما شعبنا

راهو عندو إبداع كبير و ديما في فورمة و يلعب على المريول في ميدان إيجاد الحلول

الحال شتاء والوضع مرهز من أصلو والزمان زمان عيد ولذا يتحتم على أصحاب المهن الحرة التوصل إلى تقنيات جديدة للتحيل و تنطير الصوردي من مكتوب خوه التونسي

البارح عالصباح وأنا ماشي نخدم وقفت فالضو متاع الدخلة متاع مونبليزير مستانش نشوف خالتي زينة, مرى كبيرة, معروفة و بقدرها في عالم الطلاب والشحاتين, معناها بلاصتها ضاهرة و ديما تتنقل من ضو لضو إنتي والوقت و إنتي و أيامات الجمعة. يعني خبرة كبيرة فالدومان. والبارح بما أنو نهار جمعة ففهي تجي غادى و من بعد تشد بليصتها فالجامع  الكبير متاع بورجل

ما راعني إلا أني نشوف في وجه جديد, عمري ما ريتو فالبلاصة هاذيكة, واحد غرمول يقسم مني عشرة, باع و ذراع و زوز ميترو إرتفاع, صفات تحتم عليه باش يساهم فالإبداع

الحاسيلو يسقط عليا كيف القضاء المستعجل و يقدم و يوخر و يسخطني بوحيدة:  » خويا العزيز, عندكشي دينار ولا ألفين باش نكمل حق علوش نفرح بيه الصغيرات؟ » بهمت, ما فهمت شيئ, حاولت نستوعب, باقي شيئ, النافع ربي

ما لقيت ما نجاوبو السيد, حشمت حتى باش نقلو ربي ينوب, ما أقواها الحشوة في سبيل المشوة

هذا كان يطلب دينار من عند خمسين كرهبة توى يطيح مليون فالشهر مع العلم أنو باش يخدم نصف وقت و يتمتع براحة أسبوعية متاع نهارين دون إحتساب الأعياد الرسمية الدينية

الي زاد تيقرني أكثر هو التركيز على الوازع الديني من شيرة (لموضة الوقت الحاضر) وكذلك الواعز الإنساني, آش قالي و قتلك الصغيرات مسيكنات شاهين مشوي علوش

كل واحد من حقو بش يفرح و يتمتع بالعيد أما حسب علمي العيد هذا ماهوش لا فرض لا حتي سنة إسلامية فالأصل

صحيح مذكورة و متواترة و مؤكدة أما راهو عيب و ما يجيش

كاينو واحد ماشي باش يحج و عاطي رشوة باش يخرج إمو فالقايمة و هذية أشياء تتنافى و تتناقض معى أسس الدين

الحاصل, زعمة بالطريقة هاذي العلوش يطلع بنين كيما البوصاع الي نسرقوه من شجرة الجيران؟

عمري ما ناكلو كيف يجيبو الوالد أما يضهرلي بنين ياسر كيف نتشعبط في سور دار الجيران و نبدى ناكل

برجولية ماعادش إنجم نحمل أكثر من هكة, شيئ ينطق الحجر

راهم بالعربي زادو فيه لين ماعادش

اليوم خوكم قاعد نخدم على روحي و كيف العادة ساعة ساعة نسمع كالصوت متاع مايل جديد عالأوتلوك

نعمل طلة, نشوف المايل شفيه و نرجع نخدم. المرة هاذي كيف حليت المايل ما عادش إنجم, بهمت. دخت. ما صدقتش

ما عرفتش روحي نضحك ولا نبكي ولا نعمل روحي ما فيباليش

أما الفازة تالمون ماهاش عادية, ضاهرلي يلزمها تتعدى فالموفيولا متع الأحد الرياضي

قالك هاذي وكالت أسفار, تونسية, تنضم جولة نور و مهند

الجولة هاذي, تدوم 3 أيامات كاملين يا بو قلب

تمشي 3 أيام لتركيا باش تعمل دولاشة عالبوسفور و تتفرج فالقصر الي مثلو فيه المسلسل و فوق من هذا و دونو يبدى يمني فيك أنك باش تتصور عالكرسي الي حط فوقو سي مهند ترمتوو باش تغزر لروحك فالمراية متع نور و باش تمس الريدو الي يضلمو بيه البيت باش سيادتهم يعملو واحد

الوكالة هاذي تختم كلامها باش تقلك إذا إنتي جاي باش تشوف نور ولا مهند, راهو دويو. تعمل مجهودك باش تمضمض مليح خاطرهم ما يقابلوش أما راك فالحقيقة ماشي باش تعيش بالمنى يا كبول, عفوا يا كمون

العيب موش فالوكالة هاذي الي تبيع فالجولة هاذي ب780دينار كارتة تحك في كارتة. أما راهو العيب فالجبورة إلي تشري فالمنتوج العجيب ياسر

الحقيقة, التونسي عودنا بحضورو الفعال فالمحافل الدولية كيما هاذم أما موش بالصيفة هاذي

أنا نتفكر هااك العام تبدى ماشي فالشارع تعرضك كتيبة على الحيط فيها : أنت أو لا أحد ولى تاكسي كاتب على مال كرهبتو : أنا كريستينا و أليخاندرو ألداما و ما نحكيلكمش على ماريا مرسيدس ولى قوادالوبي أما المرة هاذي ما فهمتش وين آخرتها

الحاصل هذي قالتلهم أسكتو

بلادنا مرهزة من أصلو و كمل زادو غرقوها هالبهايم والبقر

أهوكا باش تشوفو مليح, تنجمو تنزلو عالتصويرة باش تراو المايل كامل

ياخي بجاه ربي جدت عليكم؟ عمار مازال ما هبلش باش يعلق المقص. ما خس عقلكم الحاسيلو. هي هي

من شب على شيئ شاب عليه, الي يشد الكرسي مازال يسيب فيه هوا؟

ها ها ها. عميرات تونسي مقطر من صرام الكلاب

لبارح ضهرو وجعو و خذا نهار كونجي. أما فيسع فيسع رجعتلو الدودة. أهوك ملي دخل للبيرو عطاهم الحس مرة أخرى

دايلي موشن و يوتيوب هاذوكم الفخر الكبير متاع صحيبنا عميرات

تي عطاوه نيشان معلقو يتددل فالرتروفيزور متاع ال404 متاعو

هايا يا جماعة, أعملو ربي في بالكم و أرجعو لحيات عادية

يا عمار, رد بالك عاد. تمشيشي تصدق إلي الجموع سامحتك

يا عمار يا علوش حضر مقصك للكرتوش

والله عيب عليكم تظلمو فيها المرا

شبيكم تقولو عليها من حجاج عقاب الزمان و ما نعرفش عليكم

هو كيف تجي تشوف, صحيح إلي صوت المرا عورة, برى عاد كيف يبدا كيما صوت صوفية, الكلو رقة و حنان

أما صوتها ماعون خدمتها و كيما ذكر من الحديث رغم ضعفه : العمل عبادة

أهيكا مستورة المرا, ماهاش لا لابسة ديكولتي لا شي, محترمة لين تقول يزي

شعر المرا زادة عورة, أهيكة صوفية غطات شعرها

تالمون حاشمة و مسيكنة النور ينبعث من وجها لين شفايفها ولات تلمع تقول توب نيون, عيب والله عيب عليكم تتهمو فالمرا

ما زلت نسمع واحد فيكم يشكك في حجة صوفية صادق ولا أمينة فاخت والا الخرين الي بالي بالكم, راني نتفاهم معاه. و هذا يعتبر تنبيه شخصي لكل من يهمه الأمر

ومن أنذر فقد أعذر

و يا صوفية ما يهمكش في كلام الناس, حسابهم عند ربي. هيا توة نبقيك على خير و نشالله في عودة

حتى عمرة في رمضان موش بطالة, ثمة حديث يقول : من اعتمر في رمضان فكأنه حج معي