arabeBluesChroniquesCoup de GueulereligionSociétéTunisie

الله لا تربح من كان سبب

يا سيدي مانيش باش نطول عليكم برشة

توة كنت ماشي نعمل دولاشة و نطل على وليدات الحومة القدم و على الأقل آش تبقى منهم ياخي صارت فازة رجعتني نجري باش نحكيها

يا سيدي بن سيدي أنا خاج مالدار و نسكر فالباب و نسمع صوت مرا تقول : « غطي راسك إحشم من عم الراجل » والله ما رديتش بالي مالأول أما آش تحب تعمل؟ طبيعة مشومة

غزرت, ويا ليتني ما غزرت. الطفلة إلي كان لازمها تغطي شعرها خاطرني أنا متعدي عمرها ما يفوتش الثمنية سنين إذا أنا عملتلها سوم. والله ماني عارف وين ماشية بينا هالحكاية و وين آخرتها

يا ناس راهو ما يجيش. يا ناس راهو عيب. يا ناس راهو حرام زقوم. توة ماشي في بالهم عملو آفار و دخلوها لدين  الإسلام و ريزرفاولها بلاصة بروميار لوج في فردوس الجنان؟ راهي الطفلة مازالت ما تفهم والو. تشوف في صحابها و أندادها يلعبو و شايخين و في حوايج الصيف لا على بالهم لا بسخانة لا بعورات يستروها

والله غاضتني الطفلة مسكينة, تي راهم باش يهبلوها و يعقدوها و يقصولها تسكرة ألي سامبل إلى سبيطار الرازي بمنوبة المناضلة

عيب يا ناس راهو ماهوش نور خارج منها أما غل و نقمة

خدمو مخاخكم شوية

لا حول و لا قوة إلا بالله

الله لا تربح من كان سبب و على راسهم قناة إقرأ و أمثالها

49 réflexions au sujet de « الله لا تربح من كان سبب »

  1. امين
    شخصيا نرى انك هولتها لحكاية برشة وشنعة على من غير فمى حاجة تستاهل
    تو الراجل حر في بنتو اش يلبسها مادمي قاصر وهو متكفل بيها امورهم
    تجي تقلي مزالت صغيرة ومتفهم شيء من الدنيا نقلك راك خالط ثمانية سنين راهو عمر كامل وانا في عمرها موش لازم نقلك شكنت عامل في خلق ربي خلي عاد جيل توة فايقلها اكثر منا وحاسوب وجوال وشاكيرا من باش تشدها …استنى عومين ولا ثلاثة تو هاك العازب الي عندك يروحلك عقاب الليل مع ساكوبين ويقلك بابا برى اعمل دورة حاجتي بالدار هههه كبرو فيسع امين وزيد عنيهم محلولة
    عاد انا نفظل كون واقعي مع بنتي ولا ولدي ونعلمهم من الصغرة الاحترام وقيمة الجسد الانساني وحرمتو موش نخليها تحوسلي في سليب حتى لعشر سنين قال شنوة كيف اندادها وباش ماتتطلعش معقدة وداخلة بعضها ومن بعد لاطاح لادزوه نقلها احشم غطي روحك خبي لم ساقيك ماهي باش تتكونسى وتدخل بعضها ويمكن تولي تكره روحها خاصة في فترة مراهقة وتخمم تلقى انو على خاطر طلعولها تفاحتين صغار وطرف دم تلقى روحها تحرمت من حاجات و تسكر اللعب تولي تكره بدنها خاطر ماعطنهاش تفسير منطقى من الصغرة وكنا نافقو فيها وبين ليلة ونهار ولينا نخوفو فيها وربي يعلقك من شوافر عينيك وهذاكه ربي اش قال الخ من التناقض الي يحب يربي يبداه على بكري
    نعطيك مثال تو تفهمني
    تو راجل يتعرف على مرى يلعبها متفتح مطاعم وعلب ليلية ودخان وشرب مع صديقتو وسهريات على خاطر من الاول موش نيتو الزواج ومن بعد كيف يعرسو يسكر اللعب ويقلها مرتي متخرجش ونقص من الدخان قدام دارنا وغطي روحك وماعادش علب ليلية والخ موش يعمللها شوك مرتو وتفد عليه كيفاش تبدل وتزيد تنقم عليه خاطر ماعندوش راي امى متقلب كيف الطقس
    نشالله تكون فهمتني
    وبربي حكاية المتحجبات الي يهزو في ساقيهم في الزناقي الكل ماعدش تعاودها راهي فكرة مغلوطة والشاذ يحفظ ياامين مناخذوهش مقياس وعلى المقياس نغني بم برم
    تحياتي

    3amrouchs last blog post..week-end

  2. @ 3amrouch

    هكا معناها طفلة عمرها ثمانية سنينة لابسة هاك الشوليقة
    تسميها حرية ملبس…هذا هو الدمار و الجهل بعينه…وبربي قلي واعي بروحك كي تقول اللي طفلة فالعمر هاذاكا تنجم تعمل عمايل…فسرلي كيفاش؟و كانت انتي كنت هكاكة فالعمر هاذاكا موش معناها الناس الكل هكاكا…
    و الاحترام يا سيد هو كي تعلم بنتك ولا ولدك كيفاش يتصرف مع الجنس الاخر موش تجي تقصيه مالحياة جملة…راهو موش الناس الكل تشوف في طفلة عمرها 8 سنين مشروع زواج(هههههه) و لا اغتصاب و كي تجي تلبسها هاك الشوليقة الوجود متاعها كبشر ترهنو في نقبة مبلولة يعني جسد و عورة بلوغتك.
    و المحجبات اكبر منافقات في تونس و موش كان فالزناقي يهزو ساقيهم انا شخصيا ما نراتيهمش كي نروح مني ننتقم و نعمل كلب باهي و نقول بالكشي نهار نطيح على *** ***** و هاذوكم اكبر ضحايا الكبت بعد مراهقي الصحوة اللي دازين فيها متدينين نهار كامل و كي يروحو للدار يعدي الليل بطولو و هوما خانقينو لين تجيهم كرامب في يديهم….
    يا ولادي بربي قولولي وين هاززنا الشي…معناها حتى الصغار ماسلموش….يا و الله احوال

  3. Ya stuper ton scenario me parait monte comme ceux de Massir. Comme ca par hazard, en fermant la porte de votre maison, t’a entendu et vu tout ca?! Tu habites ou, au Halfaouines ou a Bab Jedid? Je me suis souvenu du film 3sfour Sta7 en lisant ton poste. Mais je ne sais pas pourquoi.

    Des histoires pareilles sont devenues trop a la mode ces jours ci. Ca fait declencher les debats Bizantins et steriles entre les gauchistes et les islamistes, qui n’arretent pas de nous faire chier les deux, et depuis le debut de leur existence.

  4. @Soufiene : bjeh rabby 3ordhekchi raouf kouka walla Jalaleddine Essaadi walla wa7ed mak eli ta7ki 3lihom?
    ken enti men bled el jacket potatoes ou el akh el massoun Rached el ghannouchi wa amthalou ou ma fi belik bchay! madha bik mela tji ou ta3mel talla! je ne vais pas répondre a tes commentaire je le trouve très déplacé j’aimais bien tes interventions pourtant.

    @Amrouch, ne tire pas vers l’autre extrême!!

    @zabrat : tom commentaire avait bien démarré, mais la chute n’est pas du tout à la hauteur.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.