BlogzoneCoup de Gueule

تستاهل ما صار عليك

والله العظيم مانيش فاهم شنية غريبة الشعب التونسي

مقبيلة عملت طلة عالمدونة متاع صاحبي البيق تراب بوي و قريت حاجات بالرسمي ركبولي السكر

الزوز تدوينات الإخرانين صارت فيها تجاوزات تحشم

بجاه ربي فسرولي راني مانيش فاهم, الدشرة ماهاش بلاصة من أرض ربي الواسعة؟ تي أنا واحد مالناس جاي من دشرة من هالدشر إلي تحكيو عليهم و جدودي جاو لتونس نازحين

وماهاش سبة باش نجي نبكي و نشكي و فلان قال دشرة ولى حفرة ولى حتى ترمة عبلة

يا ناس راهي مشاكلنا أكبر من هكة ببارشة

راهو الجماعة فتقونا من بعضنا و أحنا مازلنا لاهين في جهويات ما عندها وين توصلنا

الزح نحب نشوف نهار يتعدا من غير ما تاكل بعضها وتلحم في جرة الجهويات

أنا جاي من غار الملح وعندي عرق بربري مالجنوب رغملي قالولي إلي دار مازيغ توانسة أما أنا متأكد إلي هو شلح أمازيغي و متشرف بيه برشة

عشيرتي كافية مالسرس و عامل عليها بون كيف

صحابي من كل بر و على كل لون يا كريمة , إلي من صفاقص والي من توزر والي من جندوبة والي من قابس والي من جربة وعندي حتى صحاب من سوسة و يحبو الإيتوال ربي يشفيهم و يخفف عليهم

وهذا الكل يخلينا متفاهمين و حتى كان فمة إختلافات نتجاوزوها بالرزانة والحوار

المشكلة توة فالي قاعدين يكبرو في هالحزازيات بين الناس باش يعيثو فيها فسادا ماشين بسيستام فرق تسد

تي معز دريس يحب على ستاد أولمبي كبير في سوسة مو توة يحب على روحو و يناشد و يبايع و يشكر السياسة الرشيدة في الفترة الي تسبق التعيينات متاع 2009 على خاتر عمرها ما كانت إنتخابات و من بعد يعيى و هو يقبظ و كان سلكها توة يعطيوه دار في حي التضامن و باندرول كبيرة مكتوبة عليها بالخزامة  » معا من أجل تونس الغد » ويعود إلى البيت فرحا مسرورا

الرسمي يا جماعة لازم نفيقو شوة وتخممو في حلول باش نتلمو و نكنترو التطرفات بأنواعها كاني سياسية ولى دينية ولى إجتماعية و أخلاقية

إستيقظو بجاه ربي و فك علينا من بقايا التخلف الي قاعد ينخر في مجتمع فالهاوية

الناس ميتة بالشر والناس ملوحة فالحبوسات والناس ملوحة رواحها فالبحر باش تحرق و تهج من هالبلاد إلي ولات فيها مكثر و قبلاط أهون مالمنزه والمنار خاتر غادي ما يموت حد بالشر خاتر عندهم الفلاحة و حمد ربي أما في تونس ولات الناس تبات جواعى و وصلت تكردي فالخبز

و نهار كامل و أحنا ما مسمعو كان بنمو إقتصادي ب 6 فالميا أما التظخم ضاهرلي 60 فالميا

التونسي يحب المصبط من أول الدنيا و ربي يستر برك

 

2 réflexions au sujet de « تستاهل ما صار عليك »

  1. chapo ya3tik essa7a! g mille fwa dis a big kil fo pas kil entre dans le sale jeu des medias jaunes tel essari7 wala 7atta echourouk…mais bon il fait ce kil veut il est libre…dailleurs je me swi abstenue lors de ce post je voulais pas assister a cet vrai mahzla…le regionalisme et le fanatism du foot sont des reel venin ti tsawerrou 7atta lbac sport walla bidda5la!!! la honte win machin…yna3n din ha ta5allof win bech ywasselna

  2. ana baldya malgrés ca je te dis BRAVO , les tunisiens ont besoin d’etre secoués pour réaliser qu’ils sont dans le petrein d’un faux probléme et c’est pas le seul dailleur alors que les nations progressent.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. Apprenez comment les données de vos commentaires sont utilisées.