ChroniquesCoup de GueuleSociété

عمرو خالد, هيفاء وهبي و الجزيرة. العزوزة هاززها الواد وتقول العام صابة

اليوم حضرت في الملتقي المفتوح الي نضمتو سيجما للإستشارات و حاولت نركز شوية مع الأرقام الي كانت معقولة و مفهومة أما الحق عمري ما كنت نتصور إلي العادات التلفزية متاع التونسي منحطة للدرجة هاذي

تي الحمدولله فما المنصف باي والريسبتور نوميريك الي بالباتش سومو أرخص من حق دخان شهر كامل بالنسبة لاحد يتكيف فالكريستال. ستن دينار يا بو قلب. ريسبتور يجبد الشانات الفرانسيس الكل

من ت.ف.1 إل أرتي حتي إل أنيمو و هيستوار من غير ما ننساو ملتي فيزيون و عشاق السهريات علي ألحان الإشي إشي

الزح, أش و خمسين ولا آش و ستين بالميا مالتوانسة يتفرجو فالشانات العرب و النسبة الكبيرة منهم محصورة بين روتانا والجزيرة والقنوات الدينية كيما إقرا والناس ودين دان دون

ياخي هذا الكل التطرف الإجتماعي تمكن مالتوانسة؟

ما يعرفوه غنمي كان باللية؟

تي بجاه ربي هاذا الكل ما يتفرجوش في حاجة مثقفة و عندها بعد وجداني و روحاني أكبر

وليت نقعد باهت في عجب ربي

المسرح فارغ, السينيما يفلي والعروض الموسيقية تزغرط

هوما بيدهم الوجوه الي تشوفهم

تقولش عليها الثقافة متاعهم برك

تي أكثرشي من البارح

فما جماعة تنبور باتان عاملين لمة و ماستر كلاس متاع آلات الإيقاع قابلت اللهم صلي عالنبي عالوجيهات وهوما بيدهم الناس الي تشوفهم داخلين للتياترو

والله غريبة يا تونسي راهو هيفاء وهبي و نانسي عجرم و روبي و نجلاء ماهمش متاعنا

باش تجيو تقولولي أذواق و كالريق البارد راني تزيد تطلعلي الكلبة بنت الكلب

بجاه ربي كالعام في سهرية متاع سنية مبارك حسيت روحي كيف اليتيم

تي أما خير؟ مالوفنا و موزيكتنا وإلا هالواوا والإشي إشي؟ تي وضني ترتاح لسمير لوصيف و لطفي جرمانة و فاطمة بو ساحة أكثر من هالعرايس المطلية بالفون دو تان

وإلا كالسيد إلي مصففهم قدامو و يحكيلهم عالدين والقرءان والسيرة النبوية و هوما يبكيو و يغردو

و هوا كيما كامثل الي يقول : يبيع القرد و يظحك على شاريه

ياخي الدين نتعلموه بالتلفزة؟ نتفرجو على درش فالشريعة وفي وسط البريك يحطو إشهار متاع سارفيات هيجيانيك تمثل فيها طفلة لابسة جيب ميني و بودي لاصق و ماكياج متاع عرس, تي تنسيك في دينك و دين والديك

و يبداو عاد يحكيولك و يملاولك في مخك بالأفكار الرجعية والتخلفية والإختلاط الممنوع والحرمة والعورة و و و
الدين راهو أسمى من هكة بياسر, الدين أخلاق و سلوك و عمل و فالأفر بالكل تجي العبادة

الأخلاق والسلوك والعمل عندهم صفة إجتماعية تربطك بالمحيط متاعك والناس إلي دايرين بيك أما العبادات راهي بينك و بين خالقك. ولازمها تكون شخصية . كيما لاخر جا قالي إنتي مرتد و منافق خاترك تعمل كعبات. جاوبتو قتلو و انت ما تحسش روحك كافر كيف تحكي عالناس في غيابهم و تبزق فالشارع و تلوح الكاغط الي في يدك فالشارع؟ شنومة المقلييس متاع الكفر والإسلام؟

نجيو توا للجزيرة, راهي غلبت علي التوانسة الكل ولات تفهم فالإقتصاد والسياسة

المزمر فيهم عامل ماستار متاع جيو بوليتيك في جامعة الجزيرة بالدوحة

الناس الكل تفهم فالقضية الفلسطينية النووي الإيراني والبروباقاندا اصهيونية الإرهاب والتفجيرات واعمليات الفدائية

يا ناس سيبو عليكم من هالحكايات الفرغة وآحتكمو شوية لعقولكم

حاولو تتعمقو فالتفكير والتحليل

ربي قال إقرآ موش تفرج

والباقي ثقفو رواحكم وهذبو أذواقكم

رانا ماشين في هاوية

 

25 réflexions au sujet de « عمرو خالد, هيفاء وهبي و الجزيرة. العزوزة هاززها الواد وتقول العام صابة »

  1. فى بالكم اللى انا اول مرة نشارك فى ها المدونات صدقونى مانى فاهمة حتى شئ …هانى نكتب فى حاجات نحب انقولهم…اتفرجت فى جنون ولا مازلت….فمة مسرحية اخرى اسمها..البستك الزينة موش خايبة فمة برشة وليدات جدد عاملين بعمايلهم فى المسرح و يستحقوا التشجيع فى الحقيقة

  2. ca fait partie de mes plans pour la semaine prochaine a vrai dire , j’ai vu la pièce il y a longtemps
    pour le film d’une part j’ai préféré laisser passer le rush et d’une autre part je n’avais pas trop le temps

    sinon lance toi et cree ton propre blog

    🙂

  3. يعطيك الصحة …انا باش انخليكم توة و نمشى ناكل افيم كسكسى نودكم ولا انشهيكم a+

  4. باهي الجواب اللي وجهتو ل

    3aber sabil
    كلامه ذكرني بواحد بوليس في مركز… قالي آش دخلك ، حاسب روحك بطل
    و الحكاية الكل علاش ، على خاطر حاولت نحز عركة من بين واحد يبيع في المعدنون و جماعة البلدية
    و هزوني معاه للمركز على أساس إلي قلتلهم \

  5. « حرام عليكم » فوقفوني و قالولي إجا نشوفو تطلعش خوانجي

    الحاصيلو
    فما جماعة هذيكة نيتهم إلي دنيا ماشية بطبيعتها علاش نعقدو فيها ، علاش ننقدو في غيرنا ، علاش نكسروو في روسنا بالفلسفة و العلم الزايد و سعات تجي تحاول تقنعو تلقاه الإقناع صعيب
    كيما توا نحاول نقنع بنتي و مرتي باش ما يكثروش من الشانات اللي حكيتو عليهم ، روتانا و متاع المويسقى الصاخبة ..
    ايقولولي ، وين عايش الشباب الكل يتفرجو فيهم ، رانا في عام 2008 …
    لكن الحاجة الباهية في داري اللي ما يتفرجوش في شانات الدين
    .
    بصيفة عامة فمى زيادة في البهامة يعني تخلف و انغلاق و انحطاط فكري نلاحظ فيها على برشة توانسة
    و أغلب الناس العاديين شاديين وراء الدين و عمرو خالد و إقرأ ..
    و على ما انشوف نحن في انحدار

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.