BlogzoneCoup de GueuleSociété

موجز الأنباء : الغرق قطرة قطرة

في ظرف جمعتين المطر صبت مرتين

والبلاد غرقت مرتين

و أنا متأكد إلي فالأخبار اليلة باش يحكيولنا على الرئى الحكيمة والقرارات البنائة الي إتخذناها لتفعيل ديناميكية إقتصادية الغرظ منها النهوظ بالقطاع الفلاحى على المدى الطويل

من غير ما ننساو القرارات العاجلة ذات الفاعلية الحينية لدفع الفلاحين على مزيد البذل والعطاء لإنجاح الموسم الفلاحي بعد هطول هته الكميات الممتازة من الدر النافع

و بالمناسبة هاذي يزيدو يفكرونا بالإجراءات الكبيرة التي تسعى لترسيخ المد التضامني و يوريونا دبو كبير معبي بالزور والحليب والسكر والفارينة

معبي بالتصاور والبندرولات ودعوات و مناشدات السلط المحلية واللجان الإقليمية والتجمعات الجهوية و و و دين والديا

و فيه نفر من المنتخبين المحليين و أصحاب المؤسسات الإقتصادية لابسين كاش كولات خزامة والي شغلها الشاغل هو راحة المواطن و تأمين مكونات العيش النبيل

أما الفيضانات والخسائر والكراهب الي هزها الماء والديار الي هزها الواد والعباد الي تشردت وخسرت الي تكسبو الكل ما يحكي عليهم حد

والعباد الي عملت مخططات التجهيز و بنات قنوات تصريف مياه الأمطار والناس إلي شجعت البناء الفوضوي و ساهمت في تبديل المسارات الطبيعية للوديان والناس إلي عملت دراسات غالطة أو بالأحرى مغلوطة لأنموذح التعمير ما يحاسبهم حد

والله لقيام عيسى باش نفعدو فالميردة

و ماناش باش نقدمو

ربي يهدي ويحسن العاقبة

نصيحة لكل التونسيين : ماذا بيكم تشريو صدريات نجات تخبيوها فالدار على ما يواتي

كان فالخريف غرقنا راهو فالشتاء باش نمشيو زيزي

إتعلمو العومان هاني نقلكم

Sauve qui peut!

العين بصيرة واليد قصيرة

27 réflexions au sujet de « موجز الأنباء : الغرق قطرة قطرة »

  1. الرّشوة جمــدّت الماء في الحــــــــلاقم ! هذاك علاش يا بن عمي …كان صبّت بحرنــــــــــــــا ! و كان ما صبّتش كيف كيف بحرنــــــــــا ! الشابع من نوفمبر …صخصخ الحـــــــــلاقم .!!! يخي إسكــــــــــرو !

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *